Galasinan

Galasinan

Cing Ato

Betawi Cakung

#TradisiBetawi

Mentari mulei rada redup, bocah angon udah pada nanjakin dan giring kebo ke kandangnya.  Bocah-bocah pun udah pada digetakin nyaknya lantaran udah ampir masuk bedug  megerib. Kate engkong kalo udah ampir bedug magerib memedi pada gentayang. Mangka entuh, bocah pada digebain masuk ke dalem rumah. Takut pade kesambet atawa dibawa kabur kalong Wewe.

Pas udah azan megerib baru boleh maen di luar. Tapi bingung mau maen ke mane, orang pada gelap, paling-paling nyeng terang rumah orang adaan atauwa langgar ame mesjid. Jalanan mah gelap banget, belon entuh sunggal pinggir jalan pu'unan gede-gede banget. Jangankan malem, masih sore aje entuh memedi suka usil.

Pernah atu ari di kampung aye di Cakung pas lempengan rumah kumpi aye dan blakang langgar ada dua bocah lagi jalan dicolek memedi. Pas dicolek nyeng atu, bocah entuh nyalain tesennya.

"Lah, gua kaga nyolek eluh," sangkalnya.

"Ah, boong Luh," desek tesenya.

"Et dah, Luh kaga percayaan  amat si. Biar gua disamber gledek, kalo gua nyolek eluh," tegesnya.

"Abisnya sapa, orang kita cuman bedua doang,"jelasnya.

Bocah-bocah entuh terus lanjutin jalan, tetiba nyeng satu lagi dicolek.

"Ayo, Luh bales nyolek gua ya, ngaku...ngaku...ngaku...," Tuduhnya.

"Lah, emang Luh kotok, gua pan rada jauh," sangkal tesennya.

"Terus ..terus....terus....sapa dong nyeng nyolek," ucap bocah beduan sambil matanya ngelirik ke blakang dan bulu kuduknya pada bediri.

"Hiiiiiiii,... Memediiiiiiiiiiiiiiiii," teriak bocah-bocah sambil lari bepengin.

Emang gang mulai dari langgar ampe solokan rada angker ape waya gini entuh memedinya masi dekem. Lah, entuh di langgar aje masi ada penunggunya. Pernah dulu ustaz lagi ngobrol di teras, tangannya dibetot. Udah tuh ustaz langsung pulang. Kalo di solokan entuh dulu ada pu'un kemiri gede banget. Nah, di situ tuh masi ada memedinya nyeng mukanya kaya tampah. 

Dulu belon banyak nyeng punya tipi. Mangkanya, bocah-bocah pada maen permaenan nyeng ada waya itu. Kaya demprek, tok kadal, tok lele, dampu, yeye, gangsing, slepetan, anggaran, samaan, masak-masakan, maen bola kaki, bola gebog, bola tangkis pake papan, buat mobil-mobil ame kebo-keboan dari tanah, congklak, cublok-cublok sowong, galasinan, dan banyak deh...

Lah, dulu abis salat isya kalo malem Minggu  bocah-bocah pada maen galasinan. Pan di depan langar ada lapangan bola tepok, jadi dimanfaatin ame bocah-bocah maen galasinan. Jumlah nyeng maen 10 bocah, terdiri dari dua kelompok. Tiap kelompok terdiri 5 bocah. Atu kelompok nyeng jagain kelompok kedua nyeng maen.

Nyeng giliran maen berusaha lewatin nyeng jaga, kalo kena kecolek ame nyeng jagain maka, mati dia. Tinggal sisahnya kudu berjuang ampe lewatin nyeng jaga paling blakang.

Yah, gitu deh nyeng aye tau maen galasinan. Pokoknya resep banget, butuh kelincahan, butuh awak nyeng sehat. Butuh taktik untuk ngecohin penjaga biar bisa nyeplos. Abis maen entuh galasin awak pada keringetan, pan maennya lari-larian. 

Pas kelar maen pada rebahan di teras langgar, ada juga nyeng deprok ambil ngelapin keringet. 

Galasinan permainan nyeng nyehatin awak, mata, otak, ngelenturin awak, dan bikin plong pikiran. Pokoknya bikin sehat, bugar dan kebersamaan diantara tesen.

Beda ame bocah-bocah waya gini, maenannya bukan nyehatin justru nyusahin bikin jauh ame tesen dan ngerusikin segalanya. Males gerak, males belajar, dan males ngapa-ngapain.

Kaga percaya liat aje entuh, bukan bocah-bocah aje nyeng keranjingan handphone, bahkan baba ame nyaknya  juga kaga mau ketinggalan. Ntuh, Sunggal waktu pada ngejedog ame handphone. 

Salam literasi

Cakung, 7 Juni 2022