Matung Kebo

Matung Kebo

Cing Ato

Betawi Cakung

#TradisiBetawi

#MengikatBahasaNyengIlang

Kebiasaan baba-baba kita dulu di kampung, mau lebaran udah nyiapin jauh-jauh ari. Salah atunya matung kebo. Banyak nyeng pada ikutan dengen cara nyicil tiap bulan atawa bayar kontan. Kalo udah kumpul duitnya baru entuh kebo di beli. Sebelon puasa entuh kebo udah di beli, terus diangon  deh ama orang nyeng pengen ngangon biar bisa gemukan. Biasanya nyeng ngangong dapet jatah kepala ame daging dikit.

Satu ari menjelang lebaran entuh kebo Patung dipotong. Nyeng pada patungan pada kumpul ama bawa gegaman--golok, piso, Kampak, dan batu asaan-- buat bantuin nyacag daging ame tulang. Rame banget pada acara motong kebo. Entuh bocah pada ngeriung liatin kebo pengen dipotong.

Entuh kebo sebelon dipotong diiket dulu. Tambang dileher diiket di pu'un biar kaga ke mana-mana entuh kebo. Kaki nyeng sebelah kiri depan ame blakang diiket pake dadung nyeng rada panjang. Dadung nyeng depan dislempangin dari bawah perut terus ditarik  ke atas punggung kebo arah kiri kebo. Dadungnya dipegang dah tuh kisaran lima orang. Dadung kaki blakang dilonjorin ke arah nganan kebo. Buntut kebo dibetot ke kiri.

Kalo udah siap baru deh dibetot dadung barengan, entuh kebo ampe jatoh kebelah kiri. Tukang motong siap dah tuh motong leher kebo. Biar ade tenaga kaki kanan tukang potong ditumpangin di leher aga dikit ke badan kebo. Dengen membaca basmalah dipotonglah entuh kebo. Entuh kaki kebo jangan diiket jadi atu, biar entuh kebo kakinya nyentak-nyentak. Kalo kakinya nyentak entuh lagi mompa darah biar cepet keluar dari tubuh kebo. Nyeng kaga tau elmunya entuh kebo ape kaya ngiket pesor kaga bergerak pisan. Lah, entuh kebo kalo ampe kaga bisa klesedan pisan, dagingnya cepet bau lantaran darah masing bejibun di dalem daging.

Entuh bocah kalo lagi motong kebo romanah pengen deketin pisan, slempang kalo-kalo kebonya kelepas. Lah, bisa berabe, bisa nyrudukin entuh bocah. Kebo pan kaga pandang bulu, sapa aja nyeng ada di depannya disrudukin. Mangkanya entuh bocah pada digebahin biar rada jauan. Ya, dasar bocah abis digebah die ngranseg lagi. Ape rada sewet entuh nyeng nggebahin. Bocah pan emang kaga tau buntirannya, nyeng menting nonton. Emang resep banget si liatinnya, soalnya jarang ada, cuman setahun sekali.

Kadang-kadang penting juga entuh proses motong kebo diliatin bocah. Aye, bisa cara ngiket, ngejatoin, motong, nyesetin, nyacag, ampe cara bersihin entuh perut asil dari ngeliatin. Lah, entuh di madrasah aye jadi komandannya tiap taunnya ame di masyarakat . Udah puluhan sapi dan ratusan kambing. Dari sapi nyeng kecil ampe nyeng paling gede (Limosin) lah, aye jatoin. Cukup ampe itungan tiga entuh sapi ngejoprak. Kaga pake lama entuh leher udah putus urat-uratnya.

Kalo kata guru "Ngeliatin lebih baek dari cuman sekedar dengerin."

Tunggu ampe entuh kebo kaga bergerak baru diseset, dipotong-potong. Setelah entuh baru deh ditandingin entuh daging ame tulangnya sedemplok-sedemplok persis jumlah nyeng matung. Kalo udah kelar nandingin baru deh dimasukin karung. Begitulah proses matung kebo. Eni merupakan tradisi masyarakat Betawi tempo dulu, waya gini udah mulai terkikis lantaran susah ngangong kebonya, semua tegalan ame sawah udah pada jadi perumahan ame pasar modern. Ada si masih tradisi eni di pinggiran-pinggiran kota nyeng masih banyak bulakan atawa sawah.

Tradisi matung kebo merupakan kerempugan ame guyubnya masyarakat Betawi. Hal semacam eni sebenernya kudu dilestarikan. Biar anak keturunan bisa liat dan kaga ilang tergerus zaman.

Salam literasi

Cakung, April 2022

Cing Ato

Betawi Cakung

Guru Blogger Madrasah

Pegiat Literasi Madrasah

Penulis buku

Teacher MTsN 5 Jakarta