Jangan Ape Lepas Wudhu
Bagian ke 38
Cing Ato
Betawi Cakung
#AisyehMenungguCinte
Kiping terus berputar, waktu terus bergulir, musimpun ngikut berubah. Kaga ada nyeng tau mau jadi apa ke depan atawa kaya apa ke depan, semuanya merupakan sebuah misteri nyeng rada sulit diterka. Manusia hanya bisa berikhtiar melakoni kewajibannya sebagai makhluk Tuhan.
Mereka nyeng sukses dalem idupnya, mereka nyeng idup bukan melakoni apa adanya, tapi mereka nyeng punye mimpi luar biasa. Idup pan kudu punye mimpi. Tanpa mimpi kite idup seperti orang kebanyakan atawa orang biase-biase aje. Tapi idup jangan cuma sekedar mimpi tanpa tindakan. Mimpi tanpa tindakan cuma hayalan doang.
Seumpama mimpi udah, melakoni udah, tapi masih gagal aja pasti ada nyeng kurang beres. Sebagaimane nyeng dilakoni si Badur. Ngimpi bersanding dengan Aisyeh, ternyata lamarannya di tolak oleh orang tuanya Aisyeh.
"Ba...jadi ngelamar Aisyeh?" Tanya Badur.
"Pagi-pagi buta udeh nanyain lamaran, entar habis Ashar....enyakluh juga belon belanja buat bebaweannya," jawab Babanya.
"Jadi kan Ba," teges Badur.
"Eluh budeg Dur....pan tadi baba bilang, entar abis Ashar, baba nyuruh encang ama encing luh nyeng dateng ke sono," bentak Babanya.
"Lah, baba kaga ikut ?" Tanya Badur.
"Kaga, encang-ame encing luh aja nyeng ke sono, emang begitu budaye kite," jawab Babanya.
"Oh, gitu....," Timpal Badur.
"Ya, iya....entar kalo bawain duit baru baba ame nyakluh ngikut," jelas Babanya.
Encang dan encingnya Badur dateng ke rumahnya Aisyeh. Mereka cukup jalan kaki, maklum cuma tetangga kampung. Mereka menyusuri sawah dan kebun-kebun nyeng rindang. Kaga berapa lama mereka sampe.
"Assalamualaikum," sapa mereka.
"Waalaikum salam," jawab guru Mughni.
"Faaat..... coba luh liat sapa no nyeng dateng," suruh guru Mughni.
"Sapa ya bang," timpal nyak Fatimah.
"Mangkenye Luh liat sono dulu gida," teges guru Mughni.
"iye, bang.....," timpal nyak Fatimah.
Nyak Fatimah longok ke depan, ngeliat sapa kira-kira tamu nyeng dateng. Dieblaklah daun pintu....
"Eh, ada tamu jauh.... perasaan aye kenal deh. Bang Rofiun kan dan enih Mpok Janah, ayo masuk....silahkan duduk," suruh nyak Fatimah.
Nyak Fatimah lalu masuk nyamperin guru Mughni.
"Bang tamu jauh dari kampung sebelah, kayanya denes banget deh, segale bawa-bawaan ," kate nyak Fatimah.
"Ayo, temenin gua," ajak Guru Mughni.
Guru Mughni dan nyak Fatimah menemui tamunya di ruang depan.
"Eh, ada orang jauh, nih," sapa guru Mughni.
"Iya, guru. Lagi ade perlu," timpal tamu.
"Ade perlu ape ampe nyaba di mari?" Tanye guru Mughni.
"Gini guru, aye berdua cuma perantara, mau nyampein hajat sedara aye, sedara aye pengen nyambung silaturahmi antar dua keluarge," Kate bang Rofiun.
"Maksudnya.....," Pora-pora kaga tau guru Mughni.
"Begini guru, aye mau ngelamar anak guru buat keponakan aye, si Badur anak H. Sarbini, begitu guru," teges bang Rofiun.
"Si Badur....si Badur nyeng dulu perneh ngaji dimari," sela nyak Fatimah.
"Begini bang, si Aisyeh masih aye mau sekolahin ape tinggi. Kaga mau aye kawinin dulu," teges nyak Fatimah. Sementara guru Mughni cuma diem doangan.
"Eh, begitu. Iye udeh nanti aye sampein bang H. Sarbini," timpal bang Ropiun.
Lamaran pun ditolak secara halus. Biase kalo ditolak pake bahasa kiasan mau nerusin sekolah alias ditolak. Ada juga si nyeng ditolak mentah-mentah.
Bang Rofiun dan Mpok Janah kaga lama-lama, die langsung pamitan.....
"Karena aye udeh jelas, aye berdua mau izin pamitan guru," kate bang Rofiun.
"Lah, ko buru-buru amat....kite makan dulu aje, gimane?" Basa-basi guru Mughni.
"Kaga useh guru, entar kemaleman di jalan," timpal bang Rofiun.
"Iye, udeh...Salamin ame babanye si Badur...ye, aye mohon maaf si Aisyeh masih mau disekolahin ampe tamat dulu," kata guru Mughni.
Mereka bergegas keluar dan meninggalkan rumah guru Mughni. Selanjutnya menuju rumah si Badur untuk memberi kabar tentang hasil dari ngelamar.
Hasilnya pun disampaikan, baba dan nyaknye Badur udeh pasrah apapun keputusan yang terjadi. Lantaran die tahu pasti ditolak, guru Mughni orang yang amat open ame pendidikan anak-anaknya. Lantaran si Badur rada ngeyel ya, terpaksa dilakonin. Bang Rafiun akhirnya menyampaikan keputusan keluarga Aisyeh. Baba dan nyaknye Badur cuman pada narik napas doang. Sementara Badur nangis gegaokan sembari mukulin bantal......
Badur kaga tinggal diam, Cinte ditolak dukunpun bertindak. Diapun mulai memikirkan untuk mencari dukun buat ngerjain Aisyeh.....
Sementara guru Mughni memanggil Aisyeh.
"Aisyeh.....sini neng....," Panggil Babanya.
"Iya, Ba...bentar dulu," jawab Aisyeh.
Kaga berapa lama Aisyeh nyamperin Babanya.
"Ade ape Ba ?" Tanya Aisyeh.
"Wates enih ari baba minta jangan ape putus wudhu," pesen babanye.
"Emang ade ape si Ba?" Tanya Aisyeh penasaran.
"Entar lu tanya ame nyakluh," suruh babanye.
Aisyeh meninggalkan babanye, lalu balik ke pangkengnye. Malam hari sebelum tidur Aisyeh ngobrol ame nyaknya tentang kejadian tadi sore. Aisyeh akhirnya tau apa nyeng terjadi.
Dalem atinya berkata," Dur... Dur..... gimana si eluh pan tau gua demenan ame Mamat, kenape Luh nyerobot aje, lagian kan gua masih sekolah. Kaga bakalan orang tua gua setuju. Andaikan gua udeh tamat, belon tentu gua mau. Entuh bocah otaknya di mana ya, gua kaga abis pikir. Gua tau wataknya die rada-rada. Pantesan baba gua nyuruh jangan lepas wudhu. Ya, gua paham dah,"
Wudhu membuat orang menjadi suci baik raga maupun jiwa, hingga sulit ditembus oleh apapun. Lantaran Allah akan melindungi dari orang-orang yang zalim.
Udeh ye....enti kite lanjutin lagi
Pantun dulu ya......
Di pasar Pramuka banyak burung gelatik
Burung gelatik dimiliki kudu beli dulu
Banyak empuan nyeng pade cantik
Empuan cantik, empuan nyeng kaga lepas wudhu.
Salam literasi
Suharto
Guru Pembelajar MTsN 5
walaupun pake bahasa betawi, alhamdulillah saya ngerti... walaupun saya tidak tahu awalnya, ditunggu lanjutannya...
BalasHapus