Kebahagian Entuh Adenye di Hati
Kebahagian Entuh Adenye di Hati.
Cing Ato Betawi Cakung
#AisyehMenungguCinte
#Betawipunyecirite
Liburan semester telah tiba, para mahasiswa pulang ke kampung halamannye masing-masing, rasa kangen ame keluarge di rumeh terbayarkan ketika liburan kuliah.
Aisyeh pulang setelah ngendon di kampung orang lantaran kuliah. Ya, memang kalo kuliah jauh gitu, kudu cari kontrakan nyeng deket ame campus.
Pulang pergi kalo kuliah jauh berabe banget, tekor diongkos, keburu-buru, stress di jalan jika macet, belum bejubelan di mobil angkutan umum, belum bau ketek para penumpang, sumpek, kadang-kadang dapet mobil nyeng ngetemnye lame banget, belum turunnya suseh banget berdengsek-dengsekan. Pokoknye stress deh.
Kalo ngontrak, apalagi dapet tinggal di asrama itu paling enak. Udeh deket, penghuni semue asrame satu komunitas mashasiswa semua. Pokoknya enak deh nggak keburu-buru, nggak stress, bisa santai dulu, olah raga pagi bise saban ari.
Cukup nongkrong di teras asrame, tukang nasi uduk dan kue suka nyamperin jajakin dagangannye. Makan deh ditemenin ame teh manis. Pokoknye enak aje dari pade pulang-pergi.
Aisyeh udeh janjian ame Mamat di terminal untuk bertemu dan pulang bareng. Surat menyurat sebagai alat penghubungnye.
"Bang Mamat, liburan semester pulang nggak? Kalo pulang bareng ye, ketemu di terminal aje ye, Aisyeh iseng kendirian." Tanya Aisyah.
Mamatpun membalas surat dari Aisyeh.
"Iye, Aisyeh. InsyaAllah Abang pulang, nanti Abang tunggu di terminal di depan halte. Tetapi nanti di ujung gang kampung kite miseh. Aisyeh duluan nanti abang ngintilin dari blakang. Takut ketauan nyak Luh Syeh, hehehehe," jawab Mamat dalam surat.
Aisyeh pun membalas surat dari Mamat.
"Abang Mamat bise aje, emang nyak aye apaan, santai aje bang. Cinte perlu pengorbanan. Ketika cinta dibaluri dengan pengorbanan biasenye berakhir sangat indeh, hehehehe. Tenang aje bang percaye same aye, cinte aye sekokoh gunung di tengah samudera, dia akan kokoh walapun berbagai badai menghantamnye, hehehe. Kaye pujangge cinte aje aye. Ok, enti kite ketemu di terminal," cande Aisyeh.
Suratpun berbalas.
"Iye, cantik abang percaye aje ame cantik. InsyaAllah sebelum cantik sampe ke terminal abang udeh sampe duluan," timpal Mamat.
Menunggu bagi nyeng sedang kasmaran, atau ingin berjumpe dengen demenan. sedetik saja terasa setahun. Ya, begitulah cinta. Jika cinta sudah tertanem di hati rasanye ingin selalu bersamanye walau dibawe kelobang semut.
Katenye kalo cinte udeh melekat, tai kucingpun terase coklat. Kate nyeng cinte bute. Ya, ngga begitu kali. Cinte tetep punye etike punye adab. Cinte kudu melotot bier ngga saleh pilih. Kalo saleh pilih berabe deh urusannye. Mangke entuh, Cinte harus berbalut etike.
Akhirnye, waktu nyeng ditunggu-tunggu pun tibe. Hati enih ngga sabaran ingin berjumpe. Setelah shalat Tahajud Mamat nggak tidur lagi. Die ngemas-ngemas bareng nyeng kudu di baweh pulang, nggak ketinggalan buku-buku kuliahan die bawa juge. Maklum si kutu buku. Kalo nggak baca seharian terasa hidup enih tak ada artinya. Wajar kalo Mamat merupakan mahasiswa berprestasi di kuliahnye. Banyak prestasi nyeng die raih. Mangkenye Aisyeh demen banget ame Mamat. Ganteng, pinter, dan berakhlak. Pokoknye kalo dapetin si Mamat. Wow,....bagai hidup di alam surganye dunie.
Setelah shalat Subuh, Mamat langsung ngibrit ninggalin asrama menuju terminal. Dengan hati penuh bunga-bunga ingin ketemu demenan. Bahagia rasa hati sampai kebahagian entuh menidurkan Mamat dalam pelukan mimpi-mimpi indah. Mimpi indah membuat suasana begitu indah laksana sedang berjalan-jalan di sebuah taman nan indah.
Itulah kebahagiaan hati. Jika hati Udeh bahagia tidurpun terasa Endah walau di kursi mobil umum. Kebahagian entuh ada di hati, bukan dibande, Buktinya banyak yang banyak Bandenye hidupnya nggak bahagia. Kebahagian itu bukan di rupa, buktinye pasangan bintang film pade cere. Kebahagian bukan dijabatan, buktinye para pejabat pembawaanye masih kurang aje, ape duit rakyat ditelen. Jadi kebahagiaan entuh tempatnye di hati.
Mamat pun larut dalam mimpinya. Dalam mimpi die bertemu dengan Aisyeh. Mereka berkejar-jejaran di taman sambil melantunkan lagu bang aji Oma Irama.
" Banyak bunga di taman, hanya satu yang ku senang. Banyak anak perawan hanye Aisyeh nyeng abang sayang,....lalalalala..... lalalalala...,"
Udeh dulu ye, si Mamat lagi bobo biarin jangan dibangunin😷😷😷😷😷
..................
Pantun dulu ah.....
Ke muara Angke membeli ikan
Ikan dibeli buat Mpok ati
Harte bende bukan tempat kebahagiaan
Tempat kebahagiaan entuh di dalem hati
............
Cing Ato Betawi Cakung
cakep
BalasHapus