Kecapi Berbalut Cinte
Bagian 15
Kecapi Berbalut Cinte
#AisyehMenungguCinte
#BetawiPunyeCirite
Raja siang terus bergeser sementare jam nggak mau ketinggalan ngintilin die terus bergerak walaupun nggak ade nyeng openin die. Mangke entuh bercerminlah ame jam diopenin atawa nggak diopenin die tetep ngeloyor. Suasane semakin adem ape lagi ditambeh dengan rimbunan poon nyeng numbuh disunggal plosok jalan.
Mamat dan tesen-tesennye terus berjalan sambil gayemin kecapi, ketike die ngelawati rumeh Aisyeh ujug-ujug mereka dapati Aisyeh dan ceesnye sedang masak-masakan.
"Eh.....Aisyeh ame rombongannye lagi pade masak-masakan, kite gangguin nyok," Kate Badur.
"Jangan, iseng banget Luh, ngerjain orang," timpal Mamat.
"Nggak pape sekali-kali, kite ngumpet dipager poonan, kite timbugin kulit capi," Kate Badur.
"Ayo kite ngumpet, gua itung sampe tige, kite timpugin. Atu.......due.......tige......" Itung Badur.
Kulit-kulit capi berterbangan bagei burung nyeng ngepakin sayapnye dan nukik niblain rombongannye Aisyeh.
"Aduh...siape nyeng nimpugin kulit capi nih, sompret entuh orang, belum pernah gua geprok entuh orang. Entar kalo ketangkep gua geprok Kaye tai babal," kate Ifeh sambil dengkreng.
Ifeh dan tesen-tesennye berdiri sambil matenye ngimplengin siape nyeng isengin Mereke. Semuanye udeh siap megang kulit kecapi untuk melakukan serangan balik.
"Maju....kite bales...kayenye entuh dibalik pager," Kate Ifeh mengkomandoin.
"Eh, mereka kesiniin, gimane kite, lari aje yu, bise berabe nih,"Kate Bedil.
"Luh si iseng banget, orang lagi main Luh timpugin, jelas die mareh," timpal Mamat.
"Udeh, terus gimane," timpal Boncel.
"Kite....kagetin bareng-bareng aje," timpal Jali.
"Iye, deh....siap. atu ......due.....tige..... waaaaaaaah....." teriak Mamat dan tesen-tesennye.
"Kadal buntung, kutu kupret..... sompret Luh, nih rasain pembalasan gua," teriak Ifeh sambil nimpugin rombongannye si Mamat.
"Aduh....aduh...aduh.....ampun permaisuri....aye nyera....taubat....udeh," teriak rombongan Mamat.
"Udeh....Udeh....Udeh.....," teriak Aisyeh.
Ifeh dan kawan-kawan akhirnye berenti nimpugin. Aisyeh tahu pasti Mamat nggak ikutan nimpugin. Aisyeh sedikit-sedikit mencuri pandangan begitu juge si Mamat.
Akhirnye die berdue bertemu pandang sambil mengumbar senyum. Ifeh liat die berdue lagi berpadangan.
"Woiiiiiiiii, nyari kesempatan Luh," teriak Ifeh.
Aisyeh langsung memalingkan badan sambil berkate"Iiiiiifeh.....,"
"Mane capinye, bagi gue.....," Kate Ifeh.
Mamat pun nyodorin capi ke Aisyeh, baru aje Aisyeh mau ambil, sekonyong-konyong Badur nyelag.
"Syeh...Eni aje gedean dan kuning pasti manis, kaye orangnye," Kate Badur.
Mamat hanye terdiam sementare Aisyeh ngeliatin Mamat. Mamat hanye tersenyum.
"Lah.......gua nyeng minta kenape Luh pade ngasih Aisyeh, sini Dur buat gua," teriak Ifeh sambil ngerebut capi Badur.
"Ye, Ifeh... orang buat Aisyeh, Luh main cogro ajeh," Kate Badur.
Ifeh sudah mengetahui gelagat Badur ingin cari perhatian, sementare Ifeh tahu bahwa Aisyeh ngebetnye ame Mamat. Mangkenye die cegah sebelum terjadi sesuatu. Akhirnye Mamat ngasih ke Aisyeh.
"Nih, syeh entuk Luh, moge-moge manis, simanis Aisyeh," Kate Mamat.
"Terima kasih Mat," timpal Aisyeh sambil tersenyum hingga nampak lesung pipinye.
"Hemmm, cantik banget Aisyeh.... kenape hati eni deg-degan ye, astaghfirullah.... astaghfirullah.... astagfirullah," Kate ati Mamat sambil die buang mukenye.
Aisyeh pun dengan endahnya memegang capi, sekali-kali die letakkan di dadenye, sambil die merem meresapi Endahnye pemberian Mamat.
Ya, itulah ketike pemberian nyeng tulus dan dibarengin dengan rase Cinte, semuenye jadi endah aje, walaupun hanye sebuah kecapi. Bukan capinye nyeng dilihat, tetapi cintenye nyeng penuh perhatian.
Kecapinye nggak digayemin Aisyeh, die menyimpannye dibalik bajunye. Die hanye gayemin kecapi nyeng lainnye.
Udeh dulu yeh, besok kite nyambung lagi...
,....,.............
Pantun aaaaaaah
Kecapi bukan sembarang kecapi
Kecapi pemberian si jantung ati
Kalo Cinte udeh merasuk ke ati
Cinte sejati tak pernah bertepi
Cing Ato Betawi Cakung
Komentar
Posting Komentar